Ақтобе мен Қайрат көш бастап тұр!

Қазақстан Премьер-лигасының жаңа маусымындағы алғашқы тур ойындары сегіз команданың қатысуымен өтті. Күннің кездесулері тартысты нәтижелерге толы болды.

Автор: Дамир Кульбаев

Алғашқы матчта шымкенттік «Ордабасы» мен семейлік «Елімай» өзара күш сынасты. Кездесу 1:1 тең нәтижемен аяқталды. Есепті 16-ші минутта «Елімай» ойыншысы Свиридов ашты. Ал матчтың 74-ші минутында «Елімай» қорғаушысы Стойкович өз қақпасына гол соғып, есеп теңесті.

Алматыдағы «Хан Тәңірі» стадионында өткен кездесуде жергілікті «Алтай» алматылық «Қайратты» қабылдады. Қонақтар минималды есеппен жеңіске жетті — 0:1. Ойын тағдырын 64-ші минутта «Қайраттың» №7 ойыншысы Жоржиньо шешті.

Кездесудің алғашқы минуттарынан бастап алматылықтар шабуылға белсенді кірісіп, бірнеше қауіпті сәттер ұйымдастырды. Алайда «Алтай» да лайықты қарсылық көрсетті. Бірінші таймда алаң иелерінің қақпашысы Коновалов бірнеше тамаша сейв жасап көзге түсті. Тайм соңында алған жарақатына байланысты ол үзілістен кейін алаңға шықпай, оның орнына Алиакбар шықты.

59-ші минутта «Қайрат» сапынан алаңға Дастан Сатпаев шықты. Жанкүйерлер жас шабуылшыны ерекше қошеметпен қарсы алды. Ойынның қалған бөлігінде бастаманы толық өз қолына алған алматылық клуб 64-ші минутта Жоржиньоның голының арқасында жеңісті жұлып алып, маусымдағы алғашқы үш ұпайына қол жеткізді.

Турдың ең қызу талқыланған матчтарының бірі «Түркістан Аренада» өткен «Ақтөбе» мен «Тобыл» арасындағы кездесу болды. Бұл ойында ақтөбеліктер айқын басымдық танытып, қарсыласын 4:1 есебімен жеңді.

24-ші минутта Соса есеп ашып, алаң иелерін алға шығарды. Біраз уақыттан кейін «Тобылға» пенальти арқылы есепті теңестіруге мүмкіндік туғанымен, Герра өз мүмкіндігін пайдалана алмады. Көп ұзамай қостанайлық клуб ойыншысы Мякиш қызыл қағаз алып, командасы алаңда он ойыншымен қалды.

Екінші тайм басталысымен «Ақтөбе» басымдығын арттыра түсті. 46-ші минутта тағы бір гол соғылып, есеп ұлғайды. Кейін Досмагамбетов мергендігімен көзге түсіп, таблодағы көрсеткіш 3:0-ге жетті. 72-ші минутта Жумашев «Тобылдың» жалғыз голын соғып, айырмашылықты қысқартты.

Матч барысында «Манчестер Юнайтед» пен Португалия ұлттық құрамасының бұрынғы ойыншысы Нани 71-ші минутта алаңға шығып, араға үш минут салып Ордецтің голына нәтижелі пас берді. Осылайша ойын 4:1 есебімен аяқталды.

Ойын күнін Шымкенттегі Қажымұқан атындағы стадионда өткен «Ордабасы» мен павлодарлық «Ертіс» арасындағы кездесу қорытындылады. Қызықты өткен матч 2:2 есебімен аяқталды.

9-ші минутта Федин «Ертісті» алға шығарса, 35-ші минутта Эвертон есепті теңестірді. 63-ші минутта Седько павлодарлықтарды қайтадан алға шығарды. Алайда негізгі уақытқа қосылған 90+2-ші минутта Астанов пенальтиден гол соғып, «Ордабасыға» бір ұпай алып берді.

Алғашқы тур қорытындысы бойынша турнир кестесінің көш басында «Ақтөбе» мен «Қайрат» үш ұпайдан жинап тұр. Ал «Оқжетпес», «Ордабасы», «Елімай» және «Ертіс» командаларының еншісінде бір ұпайдан бар.

07.03.2026